احلى بسبوسه وبالقشطه كمان

السلام عليكم ورحمه الله وبركاته

ازيكو اخواتى فى الله
اليوم حبيت اقولكو على طريقه سهله لعمل احلى بسبوسه بالقشطه ان شاء الله تجربوها وتظبط معاكو ومن اول مره بس اهم حاجه انكو تدعولى لانها بجد تحففففففففه شكلها يجنن وريحتها وطعمها بجد خياااااااااااال ومش بتاخد وقت يلا بلاش رغى واقولكو على الطريقه
نقول بسم الله

اولا المقادير:

كوبايه ونص سميد الكوبايه دى اللى هى المج الازاز اللى موجود فى كل البيوت طبعا عرفينو كلكو
كوبايه سكر
وكوبايه لبن بودره
ملعقه صغيره بكنج بودر
علبه قشطه نسله او المراعى او اى نوع اللى هى 160 جرام
مقادير الشربات:كوبايه ونص سكر وعليهم كوبايه ونص ميه يغلو غلوه واحده وتضيفى عليهم شويه فانيليا وتطفى النار

جهزتو المقادير يلا نبدا بسم الله

هنحط كل المقادير الجافه على بعض ونقلبهم كويس وبعدين نعجنهم بعلبه القشطه هتتكون معاكى العجينه على طول ولو احتاج الامر لاضافه ملعقه او اتنين ميه مفيش مشكله بس متزوديش شفتو سهله ازاى وبعدين فى صنيه مقاس 30 او 28 تدهنيها سمنه او زبده وتفردى البسبوسه فيها وتدخليها الفرن لغايت لما تلاقى الجوانب ابتدت تحمر تروحى حطاها تحت الشوايه لما تاخد لون دهبى غامق وتخرجيها وتسقيها الشربات سخن وهى سخنه متنسوش البسبوسه والشربات يكونو سخنين

مستنيه تجربو وتردو عليا بدعواتكو بحسن الختام